Aaj bhook lagi hain! ... Entry by Prateek Sah, IIM Ahmedabad

aaj nahin likh raha mein apne,
pyar ki jabran faasi par,
yaad aa rahi hain aaj apni maa ki,
jab bhooka pet chilla raha udaasi par,
yaad aa rahi woh rasoi se mehak,
ghee se sani garam garam rotiyon ka haal,
sarson ke saag se badhti bhook aur,
woh jeera sookhi lal mirch ke tadke ki dal.
yaad hain mujhko woh meethi meve ki kheer,
jab rasoi mein chupke se jaakar jebon mein meva bhar leta,
aur raat mein chupke se rajai ke andar,
ek ek kaju kismish ko apne pet mein ghar deta,
woh thaali ka patanka, chillana,
maa bhook lagi hain ab khaana do,
aur fir tu parosti apne haathon se,
lagta mujhe jaise kuber ka khazaana ho,
par ab kahan reh gaya woh swaad,
aaj toh bas mehenga khaana hi khaate hain,
pet toh shayad bhar jaata hain inse,
par na jaane bhook kyun nahin mitaate hain,
maa ek baar fir se le chal mujhe bachpan mein,
baar baar uljhaata hain mujhe apni yaad se,
kasam ab kuch na chorunga thaali mein,
bas ek baar maa lauta de mujhe apne swaad se..